پرانا جھوٹ

پُرانا سچ پُرانے جھوٹ سے گَھل مِل گیا ہے
اب تو جیسے جھوٹ بھی سچ بولتا ہے
شہد زہر اور زہر شہد
ایسا اُلجھتا اور اُلجھاتا زمانہ ہے

پُرانے سچ کی سب عیّاریاں
سب وعدے
خالی خولی
پنہاں اور عیاں سب دھوکے
میٹھے لیپ کی کڑوی کسیلی گولی
ساری بات
سیدھے اُلٹے
اب سب کُھل رہی ہے
لوگ اِس کے نام پر قَے کر رہے ہیں
اس قدر نفرت ہے
اتنی آگ ہے
لگتا ہے اب حد آ گئی ہے

لیکن اتنی مدّتوں سے
لوگوں کے ذہنوں میں
آنکھوں ، اِن کے کانوں میں
کئی ، کیا کیا نہ، دیواریں کھڑی کر دی گئی ہیں
اُن کو
سیدھا صاف , روشن
دیکھنے سے روکتی، اُلجھاتی ہیں جو
وہ اِسی اُلجھاؤ میں
سَچ کو ہراتے
جھوٹے سچ کو آگے لاتے ہیں
اور اک اندھے جواری کی طرح
نعروں کے پتّوں میں سے
(اُن میں جھُوٹے بانٹے جاتے ہیں جو)
ایک ایسے نام کا جھنڈا اُٹھاتے ہیں
اِنہی دیواروں سے ہو کر جو آتا ہے
وہ ہوتا ہے
اِک ایسا جھُوٹ جو سچ بولتا ہے
جو پُرانے جھُوٹ ہی کے راستوں کو کھولتا ہے۔

۔کاوش عباسی