Hai Ye Andaaz-e-Ulfat: Ghazal by Mujeeb Ur Rehman Anjum

by Ravi Magazine · 28th March 2026

ہے یہ انداز الفت جدا، کوئی دل لگی تو نہیں
درد سارا ہے دل میں بسا،آنکھ میں کچھ نمی تو نہیں

‎ٹوٹ کر کیا بکھر جائیں ہم،تم سے بچھڑے کدھر جائیں ہم

‎راہ الفت میں مر جائیں ہم،زندگی کی کمی تو نہیں

‎کوئی جب دل کو اپنا لگے،پھر تو رنگین سپنا لگے

‎بالیقیں!اس جہاں میں وفا ملتی کہیں تو نہیں

‎سرد موسم کی پرچھائیاں،اور ظلمت کی گہرائیاں

‎ہوگئیں سب نظر میں نہاں،اب رہی روشنی تو نہیں

‎دل سے ہے اپنا مانا جسے، غیر پھر بھی نہ جانا جسے

‎دل پہ اتنے ستم جو کیے،اور گئی عاشقی تو نہیں

‎مجھکو اعزاز فرقت ملا، پھر کہاں حسب فرصت ملا

‎دل یہ زیر مصیبت ملا،اور ٹلی رات بھی تو نہیں

‎اپنا دلبر اسے مانیے،اپنا راہبر اسے جانیے

‎جسکی نظروں میں منزل ملے،ورنہ کوئی کمی تو نہیں

‎اے مجیب!اپنے دل کی کہو،دھڑکنوں کی کہانی سنو

‎اپنے دل کی زبانی سنو،پھر کسی نے سنی تو نہیں